Tripura Pradesh Congress: Tiprasa manthaini bagwi khorang tisanai Delhi Jantar Mantar
Mohandas Karamchand Gandhi ni philsarabachibrwi achaima sal palaikha Tripura Pradesh Congress. A salo Congress bodol o khung sasaibrwirasnichitham nukhungni khorok snisaibrwiranwichitham adongrog congress bodol habkha eba kwrngkha. Tongo a salo CPIM kwcham mantri Manindra Reang no khobwi tei kubuni.
Congress ni adong Sudip Roy Barman koklam sana thangwi sakha, bwskango Tripura Pradesh congress Delhi ni Jantar Mantar o Tiprasarogni bagwi khorang tisanai. Sanmungo tongnai Tiprasa ni kok Kokborok kokno Roman Scriptbai gosimung rwnani, TTAADC no Tripura Territorial Council no khobwi Direct Fund ni gosimung rwnani tei nangkukjak khwlaiwi Tiprasarogni mwthangmungno twiwi. Bono karwibo pandao bodolni samung tangnairogbo kok narwkha.
Teikhaksa bwkhak a salo teibo sana thangwi sakha Tripura o Bubagwra no borom rwnai Congress no, Bubagwra no member of parliament(MP) swnamnaibo Congress, Pradyot Kishore Debbarma no Congress bodolni achukphang swnamnaibo Congress. Phaidi hinkhe tabuk chwng palbaksa khwlaiwi samung khwlainani hwnwibo koimung narwkha pandao Congress adong Sudip Roy Barman.
A salni pandao tongo Tripura Pradesh Congress ni achukphang Ashish Kumar Saha, Sudip Roy Barman no khobwi tei Tiprasa congress ni adongrog.
