Chwng pherang kwrwi tongwi mano, phiya buphang kwrwile tongwi manglak- Minister Animesh Debbarma
Image Source: Social Media
Pradhan Mantri Narendra Modini naharmungbai Tripura haste gwnangwi " Ek ped maa ke naam" 2.0 State level program chengjakmani. Salkisa swkang rwngbedek ni bwkhaktwi Maharani Tulsibati girls higher secondary rwngnogo panda khwlaijakmani. Abohaikheno Srangsalo Bolong bedek ni bwkhaktwi Khumulwng amchaio bo " Ek ped maa ke naam" no rugwi Panda songchajakha.
A Salo Bolong bedek ni Mantri Animesh Debbarma buphang busa kaikha. Bini logio tongo TTAADC ni CEM Purna Chandra Jamatia no khoboi MLA Swapna dDebbarma akosong. Buphang bwsa kaimani yagulo TTAADC ni CEM Pandao kok naruknani thangwi sakha, Buphang kaimani chini bagwi belaino Nangkhukmani hwnwi. Curent thangkha hinkhe Saltham Salbrwi naisingwi tongmano phiyaba Buphang kwrwi hinkhe Chwng kwthang tongmanya hwnwi sakha minister.
Chwng chawi tongthokwi simi tongkhe wngwlak, Kwthang tongnani hinkhe Buphang si nangkugo hwnwi. Abono karwibo teibo Sakha, Buphang busa simi kaikheno wngya abono kaham khe naikoloibo ma toninai.
Ek Ped Maa Ke Naam
A Salni Pandao ADC ni CEM no karwi bo kok narukha Bolong bedek ni mantri Animesh Debbarma. Bo sakha, Official ni simi Sare 6 lakh Buphang busa kainani Dagimung rijakha hwnwi. Buphang no mwthangwi naruknani belaino nangkugo hwnwi bo sakha.
Phiyaba o Buphang no Kami amchaini borok rok Naikolowi tongphano City phaisingni kisasuk borok Business khwlainani bagwi Machinebai tanwi Khibio hwnwi.
Borok no kasunani hinkhe Forest protection unit kwrak ma tongnani nangnai Hwnwi bo sakha Mantri Animesh Debbarma.
A Salni Pandao TTAADC ni CEM purna Chandra jamatia tei MLA jwk Swapna Debbarma no karwi bo manjakha MDC Ganesh Debbarma,MLA Manab Debbarma,Ex Executive member Chandroday Rupini Akosong.
