Minister Bikash Debbarma Umakanta Hostel ni patimugno twiwi thangwi naikini tei koklam salaikha
Image Source: Social Media
Jora kaisao rwngnok rogo hayakhe Hostel rogo ragging khwlaijago hwnwi Koktwma rok kasawi phaimani. Phiyaba kwrak Action naharjakmani yagulo ragging no twiwi kirimung kwrwikha swrwngnairogni khao. Buma bupha hinjaknairogbo wanaya karwi bwsarogno Hostelo toniwi Poriui mankha.
Aboni kwcharono Sal kisa Swkang Umakanta rwngnok ni Hostelo Khoroknwi Chwrai markhe bujakwi Ragging khwlaijakha hinwi Koktwma kasawi phaikha.
A Koktwma khunamani yagulo Dodro khaichigwi thangkha Tiprasa hamkwrai Mantri Bikash Debbarma. Bo belaima o patimung no twiwi belaino kha khamjakha hwnwi sawi khuna rikha.
Aboni logi o patimung no selengjakwi Mantri Bikash koktwma thumnairogni bwskango phaiwi Sakha, Central Rajakhor agulini hai Umakanta Rwngnokni Hostelo Jotto Chwrai rokno kahamkhe lekha swrwngthun hwnwi buma bupha song wanaya karwi aro rohoro. Aro Ragging hayakhe dadagiri phunukna jagaya hinwi Sakha Mantri.
Mantri Bikash teibo sakha,Hostel ni super tei headmaster kok salaiwi borog no dagimung rikha o ragging khwlainai Chwrai rokno hostel ni Kari rohornani bagwi.
Aboni logi logi tamung kunu chwrai poriya karwi Dadagiri phunukhe bono Police ni thani yapharwi rinani bagwibo sakha. Paithago mantri Bikash Debbarma sakha, Datino hostel Super teibo chitok jaknai tei Night guard bo tonijaknai bwskangni salo chwrai rok kaham khe Naikolmung mana wngthuk tei swrwngmung kaham wngnani bagwi hwnwi sakha mantri.
