Salnwi romwi philbachitham bisi haste koklam panda : Kokborok Sahitya Sabha
Image Source: Social Media
Nokha salnwi romwi Tripura hasteni Kokborok Sahitya Sabha ni philbachitham haste koklam panda khwlaikha. Chati kwthar phwnangwi chengsawi rwkha Sahitya sabhani adong tei manjaknai adongrog.
A salni koklam pandao Forest Minister Animesh Debbarma kwbangkuk khwlaiwi koklam sana thangwi Roman Scriptbaino kokborokno porinani tei swinani kokbo kwcharkha.
Nangkukjak khwlaiwi bwskangni salo bahaikhe teibo swithani teibo kwtal achaisongrog phaiwi gwdalwi man aborogno twiwibo khorang tisawi sakha Minister.
Salnwi ni pandao Kokborok jadu kolija, mwsamung tei rwchapmung akorog rwchaplaiwi khatung khajakhe palaimani nukjakha.
53rd Kokborok Sahitya Sabha
Pandao Ph.d khaijak Dr. Biplab Debbarma no Kokborok Sahitya Sabha ni bwkhaktwi award akorog yapharjakha.
philbachitham koklam pandao kwrwngkha Ramesh Debbarma, Bikashrai Debbarma, Nanda Kumar Debbarma, Sabir Debbarma, MDC Bidyut Debbarma no khobwu tei kubuni adongrog.
