Corona ni swlaiphano kotor Lockdown wngwi mano Tripura hasteo khorang tisakha Youth Tipra Federation
Image Source: Social Media
Sal kisa Swkang Tripura hasteni Gomati Hangkhor ni DM Tarit Kanti Chakma Maharaja Pradyot Kishorbai malayawi lachimung riwi khiphilwi rimano twiwi YTF, TWF tei Tiprasa Dophano Hamjaknai lukurokni bisingo kha Yoksamani nukjakha. Aboni bagwi borog khorang bo tisalaikha DM Tarit Kanti no aroni nornani bagwi phiyaba Haste haphang Borokni kokno khunju kai khunaliya.
Aboni bagwi tungphlamung phunugwi YTF swkango kok rijak tongmani haikhe tangsalo DM habanok Tala khapere rinani bagwi jotto no aro phai kuthum laimani nukjakha. A Salo borogno kasunani bagwi aro kwbangma naimwthang bodolni brindiyarogno tonijakha phiyaba borogo kasuwi naruk manliya.
Watwi sek sek ni bisingono a salo Bubagra long live hwnwi Khorang tislaikha YTF,TWF tei Tipra motha bodol, Abo simiya a Salo borog Police Bai daga chopa wnglaiwi brigade swbaiwi DM habanok bo Tala khaperewi rilaikha.
DM Office, Tripura
Yango koktwma thumnairogni bwskango phaiwi YTF President Suraj Debbarma sakha,DM Tarit Kanti Chakma no aroni Norya sak Borok Tala khulukya hinwi.
Borogni o Choba no tamung no Haste haphang hailalang khe nakhe Bwskang ni salo Joto hangkhoro ni Habanok Tala khaichik rinai sakha Kok kwrak khe Sakha. Aboni logi logi Jotto Hangkhoro no Lama bo kasujaknai hinwi.
A Salo YTF District president bo Prasmit Debbarma bo sakha, Tini ni O Choba Tabuk sak jora mukthang wngkha.Tabuk haphang ni bwkhaktwi bobohai action naharjakno abo simi naisinglai tongkho hwnwi. Tamung no Haste haphang Borogni Sanmung no Gosiwi naharya hinkhe Phainai salo Choba Kotor khe nuknai hinwi.
A Salo TWF ni president Manihar debbarma bo kok narukha,Tipra motha,YTF,TWF rokni Phan Tabuk bo Haphang nukya kho hwnwi. Dati Dati DM Tarit Kanti Chakma no aroni Norya hinkhe hayakhe bono o post ni tikhlaiya hinkhe phainai salo Joto hangkhoro o Choba Kotor khe wngnai hinwi.Borok Haste haphang no damba jora wanswkna bagwi Rijak. paithago Haphang Borokni Kokno naiwi DM no noda norno hayakhe Borok ni kokno Da khitarwi phunukno Abono naisinglaijak Tipra motha ,YTF tei TWF ni bodol hwnwi koktwma.
