Tipra motha Party sengkrak David Murasing : Ama chakrakmani hamari tai haa twiwi norogni hamjakma loge twiwi thangsinai dophani chobani yapri
Image Source: Social Media
Chasalo swkango sakhwlaijakno rwksawi Tipra Motha Partyni adong David Murasing mwtai rwimani nukjakha. a salo bo sakha Sal kudukma Romwi no tongkosong lukurok bwini dophangbai thungjagwi tongmani bagwi Tripura Hasteno Greater Tipraland swnamnani bagwi khorang tisalaiwi phaimani Tripura hasteni baksa baksa sijak nukjak tongkosong lukurog.
Abono twiwi Tripurani Maharaja Pradyot Kishore Debbarmabo juda juda thaio kotor khe panda khwlaimani uram uramno nukjagwi tongo. Aboni yagulono Central Haphang Separate state hayakhe Tiprasa Accord rinai hinwi gosiwi naharkha.
Phiyaba Taldokni yagulobo Central Haphang je kok rimani haikhe phunukwi manyakho. Aboni bagwi Tipra motha ni Sengkrak David Murasing Tiprasa Accord no twiwi Central Haphang no mwitu khwlairinani bagwi Yakungbai himwi no delhi thangnani wansukmung naharkha.
O Wanswkmung twiwi no Chasal phung ni simi Haa ni gola twiwi kwrwng kwrwng thainai Haa kwthar thumkha Tipra motha ni Sengkwrak David murasing.
Koktwma thumnaibai kok sanani thangwi David murasing Sakha, Bisisnichiba (75) Romwi Tripura Hasteo Tiprasarog kubun thaini phainai haikhe buini dophabai thungjagwi ma tongo hwnwino o yapri.
Bwini yakni yoknani bagwi waire waire khorang tisamani yagulo central haphang Tiprasa Accord rinai hinwi gosikha phiyaba tabuk phano riya wngmanibai bo Sakbaithang Mwtai nokthar ni haa kwthar gola no twiwi himwi Delhi thanai hinwi sakha.
Tamung no Tiprasa dophani borok rok nogo tongtwi phano phan rikhe eba joto bodol ni neta rok thansa wngkha hinkhe o Choba no kebo kasuwi manya hwnwi sakha.
Paithago joto borok ni thani hamari sankha Tiprasa Sengkwrak David murasing. A salo Tipra mothani Sengkwrak David murasing Sri Sri Hari Charan nokthar, Pilak, Harichan gosai, Amaa Tripureswari nokthar tei kubun mwtai nokthar rogo bo thangwi Haa kwthar thumnai hinwi Koktwma.
Koktwmao teibo sawi mankha bwskangni salo Tripura kwrwng kwrwng Church tei Majzid nokrogobo thanganw.
