40 Years wngkha 23rd August 1984 bisio 6th schedule manmani TTAADC ! India PM(Former) Indra Gandhi ni bwthai

by Gobin Debbarma - Aug 23, 2023 2:06 PM

TTAADC amchaio 6^th schedule palaimani sal khumulwng head quart o panda kotor khwlaijakha. o songsama salno rwksawi panda chengnani swkang rally khwlaijakha. 

TTAADC sanmani 1967  bisini 10^th,11^th,12^th  March Sadar ni Kainta Kwpra Tripura Upajati Juba samittee(TUJS) o. O sanmungno twiwi bisi kolokma romwino khorang tisajak tongmani. o sanmungno twiwi kwbangma borok ni langma chona nangkha tei bwtharjakha, baksa Jail o, baksaba bujakna nangkha tei baksani nok-huk sokchajakha.1984 bisi 23^rd August mankha TTAADC. 

Kokthum o sawi mankha ah jora Tripura CPIM Govt. tongmani. 17^th  August Bharat ni  Loksabha o bill tisajakha.Aphuruno CM Nripen Chakraborty khoroknwi MP no Loksabha o rohorliya. Aborog wngkha MP(East) Bajuban Reang tei MP(West) Ajoy Biswas rohorjakliya Loksabha o. 6^th schedule santhani eba choba khaina thangthani 1980 bisio Tripura hasteo choba kotorma patimung patikha. 

6^th schedule santhani 1980 bisio choba kotorma nangkha Tripura hasteo. Tiprasa no mwthangmung tubuthani Shyma Charan Tripura, Bijoy Kumar Hrangkhawl, Drao Kumar Reang, Rati Mohan Jamatia, Harinath Debbarma, Nagendra Jamatia, Budha Debbarma, Gour Sankar Reang, Rabindra Debbarma, Diba Chandra Hrangkhowl jotono romjakha. Ah jora choba khwlaiwi rwkha Wansa Tiprasa choba ah jorani Govt. Teibo sawi manjakha ah jorani choba o kwbangma Tiprasa bwtharjakha. Bijoy Kumar School Agartala ni Tiprsarog thumsakhe tongnani nangkha. Radhanagar, lama lampra malkhung kasuwi bujakna nangkha, Udaipur Shilgati, Totabari, champaknagarni Kulanthakur bujakna nangkha eba baksaba bwtharjakha. 

Ah jora O patimungno twiwi chethorwi naina bagwi Central ni Home Minister thangwi sogwikha Tripura o. Ah jora India Congress govt. tongmani. Aphuruni Home Minister Giani Zail Singh Tripura choba wngmano twiwi joto kokthum naharkha. Paithago Dinesh singh committee swnamwi tangwi choba kotorma wngkha? Tei tangwi 6^th schedule sanani nangkha Tiprasarog o thainwi swngmungno twiwino Ulo kaisa  committee ni bisingtwi kami thwgwi Hunger Strike khwlailaikha Pabitra bakti Debbarma, Pabitra Rani Debbarma, Kripa rani Debbarmano kwbang bwrwirog ah jora chaya nungya karwi choba khwlaiwi Delhio thangwi Malaikha India PM(Former) Indira Gandhi bai. Paithago 23^rd August 1984 bisio TTAADC 6^th Schedule rwjago TTAADC no.