Humkuk Petroleum, Takarjala phiyogwi rwjakha : Malkhung sonairogni bagwi tei mungsa wanamung tonglak !
Phasalo Tripura ni Takarjala amchaio Humkuk Petroleum phiyogwi rwkha. Sal kwdwk ni ulo abohaikhe Tripura ni Takarjala amchaio Petrol tei Diesel manthogwi khatwtwng wnglaijak malkhung sonai tongkosong lukurog. Riduk rawi pump no phiyogwi rwkha TTAADC CEM Purna Chandra Jamatia no khobwi tei kubuni.
Pandao kok narwkna thangwi CEM sakha, abohai Petrol Pump bwskangni salo tei yapri naharnani kokmangbo tisakha.
Tong kosong lukurog sal kwdwkma romwi dalbidal jwngjal kuplwng tongmani aborogno nugwi khatunglaijakha.
Khursathaio kwlaio bisi kwdwkma romwino Agartala, Bishramganj,Bishalgarth ni petrol pump no khakawino tongna nangmani. Phiya tabuk aboni yakni kisale hamchal wngnai hwnwi tongthoklaijak.
Phiyokmungni pandao tongo TTAADC CEM Purna Chandra Jamatia, MLA Sobodh Debbarma, MLA Manab Debbarma, MLA Biswajit Kalai, MDC Uma Sankar Debbarma, EX-MLA Rajeswar Debbarma, Joint Chairman ZDC Rakesh Debabrma, Chairman Sub-ZDO Apon Debbarma no khobwi tei kubuni.
