Maharaj Bir Bikram Airport Prepaid Auto tei Taxi Counter phiyogwi rwkha Tripura hasteni rwkakhung montri Sushanta Chowdhury
Srangsalo kaisa pandani bisingtwi MBB Airport o Prepaid Auto tei Taxi Counter phiyogwi rwkha Tripura ni rwkakhung bedekni montri Sushanta Chowdhury. Panda o malkhung sonairogbo manjakha.
Haste tei hayung haa kotorni lukurog salbrum khorok brwisai adongrog thanglaisu khwlaio o Airport twi. Malkhung sonairogbo abohai kha kahamno wngnani nangnai. Haikhesi hasteni mung teibo kuchugo kasanai hwnwi sakha montri Sushanta.
Rwkakhung bedekni bisingwtwi a salo khorok thamrachisa Prepaid auto sonai tei khorok bachiba Prepaid Taxi sonairogno Uniform yapharkha.
Koklam sana thangwi montri teibo sakha, Tripura hasteo habnani tei twngsa lama wngkha MBB Airport. Northeast ni bisingo kaisa chikonsa Airport hinphano puila thaio tongo o airport. Taklai bisi ni simi bisi brum malkhung sonairogno uniform yapharjaknai.
Pandao manjakha salthang bwkhaste Police Super Dr. Kiran kumar K, Traffic bedekni add. Police Super no khobwi tei kubuni samung tangnairog.
