Ani amani kokno angsi soi khwlainai, nwng khwlainai sabo?
Swkango sakhwlaijak tongma haikhe hainohai Tipra Women Federation chango ri khawi panthoro nongkhorlai Kokborok kokno roman scriptbai khwlaina bagwi. A salo TWF ni phaisingtwi bugrakhorni Astable thwngkholani simi Raj Bhavan Abhiyaan o thanglaikha. Tripura hasteni bwrwi bodolni phan swrai swraikhe phunuklaikha. Abono karwibo hasteni kaichar hangkhorni lukurogno aro kwrwngmani nukjakha. A salobo kubuni salni haikhe Circuit house Policerog kasulaikha rally kwrwngjakrogno.
A salo TWF ni adongjwk okra eba MLA Swapna Debbarma Tripura hasteni hastepha Satyadev Narayan Arya memorandum yapharkha. Bo sakha hastepha ni wansukmung positive no tei nokha salthamni bisingo swrai swraikhe kokthum rwnai tei kahamno bwthai mananw hwnwi wansukjak.
A salo choba khwlaina nangnai tangwi hinkhe Chobani bisingtwi kwbangma bwthai o hayungo tubujak tei kiphilwibo manjak. Aboni bagwi kha kuwar khwlaiwi bwskango chwng joto himnani nangnai haikhesi Kokborok kok roman script mania hwnwi sakha Opposition MLA Animesh Debbarma.
A salni rally o nangkukjak adongrogni bisingo tongo Animesh Debbarma, Brishaketu Debbarma, Rabindra Debbarma, Paul Dangshu, Meri Debbarma khobwi tei hoda hamkrai ni samung tangnairog.
