Mega Mass Gathering: Meghalaya CM Conrad Kongkal Sangma kwrwngkha Tipra Motha Party ni Mega Mass Gathering

by Gobin Debbarma - Oct 14, 2023 4:30 PM

Phasalo kaisa kotorma lukuthum panda khwlaikha Tripura ni 6^th schedule area TTAADC Khumulwng Head Quarter gana ni thwngkholao. Panda songsakha Tipra Motha Party. A salni pandao lukurogno kwbangkhe kuthumani nukjakha.

Maharaja Bir Bikram Airport o Meghalaya CM Conrad Kongkal Sangma no lamsokha Tipra Motha ni samung tangnairog. Aroni simi Tripura ni Khumulwng lukuthum panda kwrwngkha. Pandao kwrwngwi Meghalaya ni CM sakha ang kebono swngya tini o lukuthum panda o kwrwngnani bagwi. Baksa baksa borok ano swng tangwi aro thangna nai, ang sakha ang ani Tiprasa takhukrogno logi rwna bagwi thangnai. Abono karwibo teibo sakha o democracy lamao jotoni no manthai tongo. Maharaj Pradyot ni khorang chwng jotono khwnao tei kisa khalogwi naisingdi manai salsaya salsa norogni manthai. Ang support khaiwino tini aro nini kami eba norogni lukuthum pandao kwrwngo. Thinango teibo chubanai.

Tipra Motha Party Founder Maharaj Pradyot Bikram Kishore Manikya Debbarma koklam panda sakha Tiprasa Unity tongna nangnai tei sal kisa naisingdi ang aswkno Sanai. Bwskangni kwbang kwtal kwtal party phiyokjaknai eba phiyogwibo tongo ang mungsa sana thanglak. Borogno aswkno sana muchungo teibwswk kwtal bodol swnamsinai pal baksakhe tongkhe thinang samung khwlainani mungsa wanana nanglak.

Chini party chini nangkukjak manthai Greater Tipraland yakargwlak jeswk mansak bwskango himnai. A salni lukuthum panda o dalbidal rwngthwng boddol ni samung tangmarogno yaksi surwi sakha. Abono karwibo laiwi thangjak Tripura ni kwcham CPIM CM Manik Sarkar no sejagwi koklam sakha Maharaj Pradyot.

Pandao kwrwngkha Tipra motha Party adong tei adongjwk, MDC, EM, MLA no khobwi tei kubuni samung tangnairog.