Phiyokjakha Drugs Rehabilitation Centre, Khumulwng TTAADC
International Day Against Drugs Abuse and Illicit Trafficking 26th June o palaijago bisi brum brumno. Tripura hasteo dalbidal hoda hamkraini samung tangnairog, haste haphang tei private ni bwkhaktwibo o salno palaijakha. Abohaikhe 6th schedule area ni Tripura Tribals Areas Autonomous District Council(TTAADC) Tipra motha phano phaimani yagolo Drugs Rehabilitation Centra puila ADC Govt. bwkhaktwi phiyogwi rwjakha. Haste tei amchaini lukurogni kokno khorogo wansugwino o samungno dakti dakti chengrwui tongthai nokrog pairwmani. Tangsalo Khumulungno o centre phiyokmungni pandao manjakha Tripura ni bubagra Pradyot Bikram Manikya Debabrma. A salo kubuni adongrogni bisingo tongo Purna Chandra Jamatia, Kamal Kalai, Dolly Reang, Suhel Debbarma tei Rabindra Debbarma akosong.
Hasteo salbrumno kwrwngsaya kwrwngsa thaio phekmungno kebengwi panthoro nongkhormungo Policerog chasamung manwi tongo tei drugs phalnairognobo yaphao chobwi tongo. Drugs chini dopha ni bekrengno kebel khwlaio. A salni panda kwbangma dal bidal rwngnokni swrwngnairog pandao kwrwngkha.Drugsbai bahaikhe hakchal tongnai tei o manwirog chakhe tamo wng aborogno twiwi sicharwmungni kok sakha Maharaj Pradyot.
Abono karwibo a salo tomungo phekmungbai kakjak haste swnamna hinkhe chikonsa ah no roma haikheno kotor ah nobo yaphao chopna nangnai. Tomung kebo rwngthwngni adongrog aro kwrwngjak tongkhe tei ari bakhogwi thanglaisu khwlainairogno jai jai khwlaiwi naikini khwlaiwi yaphao chopna nangnai haikhesi soi soi phekmungbai kakjak haste wngsuknai sakha Bubagra.
