Watwino watwi hinyawi yago kwchak bana twiwi rally kotorma khaikha Agartala : CPIM
Sangrongsalo Agartala CPIM ni bwkhaktwi kotorma rally khwlaikha tei hohom dodomkhe kwrwngkha Tripura hasteni kaichar hangkhorni tongkosong lukurog.
Khursathai kwlaio bisi thamchiba Tripura CPIM haphang chamani ulo tabuk twrwk twrwk bodolni phano teiwaisa kiphilwi tubuna bagwi yapri thong rak rwna bagwi samung tangwi tongo CPIM.
A salni rally o kaiba/kaidok sanmungno twiwi kotorkuk rally khwlaikha. 2023 Bidhansabha eba 2024 Loksabha chongbari dalbidal khwlaiwi hanang pinang khwlaijakha bodolni samung tangnairog. Hasteni tabukni montri okra bwkhak naisigwi kerong raidani khorangbo tisakha kwcham montri okra Manik Sarkar.
Tripura hasteo sal kisa swkang watwi waui derakoro wngmani aborog kahamkhe da naijak khorang tisakha kwcham montri okra eba CPIM ni adong Manik Sarkar.
Koklam sana thangwi CPIM adong Jitendra Chaudhury sakha, hasteo tabuk salbrum no bwtharma patimung patiwi tongo, abo sabo khwlaiwi tong tei tangwi abohai patimung? Haphang naiki khwlaina da nang ! Swrai swraikhe a salo tabuk BJP haphang no teskarakhe sejakha Jiten.
