Youth Tipra Federation: Salsa ni koklam panda TTAADC Khumulwng ni Nuai Hall
Phasalo kaisa nangkukjak YTF ni koklam panda songsajakha Tripura ni TTAADC Nuai Hallo . swkangno sakhwlaijakma haikheno panda naithothokhe khwlaijakha.
Pandano chati sogwi chengwi rwkha Tipra Motha Party Founder Bubagra Pradyot Bikram Kishore Manikya Debbarma. Hohom dodom khwlaiwi pandao lukurogno kwrwngmani nukjakha.
A salni koklam pandao manjagwi Bubagra sakha, Bwskangni salo khwlaijaknai kwbangma chini samung, Youth Tipra Federation tei Tipra Women Federation ni chubachuni bisingtwi Tipra Motha swkangwi phaikha.
Alaida khwlaiwi Bubagra a salo Delhi ni NDA haphangbai Agreement khaimano twiwi kok khursawi sakha, dakti aswk mana hwnwi ta wansukdi choba teibo khwlaijaknai tongkhu. Phiya tomung o agreement no twiwi mungsa khwlaijakya hinkhe chwng haino siring siring tonglak hwnwibo mung khuyawi sakha.
Abono karwibo Tripura Tribal Areas Autonomous District Council (TTAADC) ni Education system no swlainani kokmangbo khursawi sakha tei siklarogno phwrwngmungni sebuk o chitoknani kokbo sakha.
A salni pandao manjakha TTAADC CEM Purna Chandra Jamatia, EM Suhel Debbarma, Rajesh Tripura, Lemon Debbarma, MLA Manab Debbarma, MDC Ganesh Debbarma no khobwi tei kubuni.
