Phasalo swkangno sakhwlaijakno rwksawi NLFT tei ATTFni bwkhaktwi National High Way lama kasulaikha. Kendra haphang, Tripura haphangni thumsakhe chaitokmungni bisingtwi kok khajak tongmani eba accord khaijak tongmani bisiknwi swkang.
Phungni damdokni simi chengjakmani damsnichinwi romwi bandno kitingwi. Abohaikhe Tripura hasteni Champaknagar, Hathai kotor lamao achuklaijak bodolni samung tangnairog. Koktwmao sawi mankha kwbangma malkhung lamao kwchajak tongmani sakhamya, birkhungbai thangnai tei rwngswrwngnairog. Paithago Policeni chaitokmungni bisingtwi borogno lamabo phiyogwi rohorjakha.
ATTF tei NLFT ni adong koktwma thumnairogno sakha, chwng chini accord khaijak tongmungno manya hinkhe o damsnichinwi band simi tonglak teibo yapri krak naharjaknai. Chwngno tei bwswk thwngsinai bisinwi kakha, chini nok, nukhung joto kwmajak. Abono karwisi chwng jephuru yak tisawi phaio aphuru jotowi 1200 mung rwjak phiya officialy o mung tisakha 91/93 hai. tangwi hai wngnani kwlai hwnwibo khorang tisamani nukjakha.
Alaida khaiwi mungsa thaio tabuksa jora patimung wngmani koktwma kwrwi hwnwibo sawi mankha.
