Twipra Student Federation : TSCB Exam o thwinai tei sakdukhumanairogni bagwi khorang tiskha!
2nd May 2024 belai kirimasinsa patimung patikha Assam hasteni Dima Hasao laharo. O patimungo kwbangkukno Tripura amjokmung rwnairog mang. Amjokmung wngkha Tripura State Co-Operative Bank ni. Phiya tangwi o patimung? Tamoni bagwi kubun hasteo amjokmung rwina nang? Saboni bwsa, saboniba bwsai, baksaba nogo kiphilma o patimungni majra sabo naharnai kwbangma koksilsamung tisalaimani nukjakha Social Mediao.
Tabuksa jora khoroksa ni langma choma patimung. Baksano saknairwjagwi tongo Assam haste sakhamnogo.
Twipra Student's Federation Tripura State Co Operative Bank managing Director ni thani khorang tisakha bwskangni salo amjokmung naharjakphinani, tei thwinai nukhungni borokno sebuk tei sakhamya kwlaijakrogno haphangni bwkhaktwi chubachu rwnani sanmung.
TSU, TYFI aboni swkangbo o patimungno twiwi khorang tisamani nukjakha.
Teibo sawi mankha kwbangma lukurogni khuktwi o patimung eba jephuru TSCB Exam ni bagwi phatar hasteo center sakhwlaio aphuru kebo khorang tisanai kwrwi? Lahar patimung patima ulo jotono janija bodolni kaham samung bwtang phunukna bagwi khorang tisamani nujagwi tongo hwnwi salaijak tongkosong eba hojak tongnai lukurog.
