Smoke House, Guest House tei Kherengbar sakhamnok daktino kwtal khe nugwi manai – TTAADC EM Kamal Kalai
Krasalo TTAADC Haphang Tiprasa Hamkrai tangbedekni luajimung bai khok thamchiba rwjag rang swbaiwi Khung bachi Smoke House eba Hukul Nok swnamjakna thangwi tongo.
Koktwma thumnairokni panda khaiwi TTAADC EM Kamal Koloi sakha Hukul Nok swnammani bisingtwi kaham Rubber swnamui mannai tei aboni bisingtwi rangmarirok kaham ajiwi mannai.
Smoke House Khungsa tangthani rang bainai khok snichiba rasai rang eba 75 lakhs.
Bo a salo teibo sakha Smoke House khungsao nukhung khung nwirano twidulwi motha khamani bisingtwi mothano samungni barja yapharjaknai.
Koktwma thumnairokni pandao teibo nangkukjak koklamo EM sakha Tirtha tero thangnairogni bagwi lelathai eba Guest House daktino tangna thangwi tongmani kokbo khursakha.
Haste haphang ADC haphangno rang horkha aboni bagwino lukurokni kokno wansogwi sepsap dakti rina chaitokjak ADC Haphang.
Koktwma thumnairokni bwskango "Raima Saima" mungwi naurai tongthai khok thamchiba rwjag rang swbaiwi swnamjakna thangwi tongmano sakha.
Aborokno karwibo Kherengbar sakhamnok no khok chi rwjag rang swbaiwi teibo chukrina thangwi tongo.
Mobile Medical Unit ni seprokno twiwi bo kok sakha.
koktwma thumnairokni pandao manjakha ADC haphangni Habanok Chariphang Okra C.K.Jamatia, Tiprasa hamkrai tangbedekni Jaiphang Budhillian Hrangkhwal.
