116th Maharaja Bir Bikram Kishore Manikya Bahadur Debbarma achaima sal palaikha : nokha salnwi romwi TTAADC
Koktisalni simi nokha salnwi romwi Khumulwng ni Nuai Hallo Maharaja Bir Bikram Kishore Manikya Bahadur Debbarma ni philsarachidok achaima sal palaijakha. Koklam panda tei mangpili phunukmung akorog phunukjakha.
Pandao manjagwi Tripura CM Dr. Manik Saha sakha, laiwi thangjak Tripura CPIM haphang tongphuru mungsa jai khaijakliya Tripura Royal Family no, phiya 2018 bisio BJP Tripura haphang khamani ulo jai jai khwlaiwi Tripura ni Royal Family no borom yapharwi tongo tei thinangobo o samung khaijaknai. Abono karwibo bini achaima salno rwksawi Tripura haphang lelamung ni salbo sakhwlaijak tei dalbidal thaio borom rwjagwi tongo. Teikhaksa bwkhak bwskangni salo joto thumsakhe samung khwlainani kokmangbo tisakha.
Tabukni Maharaj Pradyot sakha, thwiwi thangjak Maharaj Tripura ni tong kosong lukurogni bagwi torwkjak samungrog teibo khainani kokbo sakha tei laiwi thangjak jora CPIM samung tangmani kokrogno selengmungni kokbo sakha.
Pandao hohom dodomkhe tongkosong lukurog kwrwngkha tei abono puila TTAADC haphangni bwkhaktwi abohai puila yapri naharmani.
Manjakha pandao TTAADC CEM Purna Chandra Jamatia, Maharaj Kumari Pragya Debbarma, MP Kriti Devi Singh Debbarma no khobwi kubuni samung tangnairog.
