15th Years Foundation Day Tribal Folk Music College TTAADC : Music wngkha hayungni bithi-EM Suhel Debbarma

by Gobin Debbarma - Oct 1, 2024 6:08 PM

Krasalo TTAADC 6^th Schedule area ni bisingo khobjak Tripura Tribal Folk Music College ni philchiba songsama sal  palaikha. Tongthotok ni bisingtwi a salo college ni swrwngnai tei school ni swrwngnairogbo pandao kwrwngkha.

Khursathai kwlaio 2009 bisini simi Tripura 6^th Schedule Area puila Music College chengjakmani. Aphuruni simi twrwk twrwk yapri sewino tabuk yapri sewi tongo hwnwibo sakha College ni Principal.

TTAADC EM Suhel Debbarma sakha, Bwskangni salo TTAADC haphangni bwkhaktwibo kaisa kotorma yapri naharjaknai. Teibo sakha hoda dalbidal borok tongo, baksaba Doctor tongnai, baksaba Leader tongnai, baksaba Engineer tongnai tei baksaba Music no twiwi yapri sejak tongnai. O music ni phan belai kotorma tongo. Rwchapmungni bisingtwino hayung tei haa kotor eba hasteno sinimung rwui mano.

Music wngkha hayung haa kotorni jotoniswlai bithi kotor manwi. O manwino kahamkhe naikini khwlaithai tei yapri naharthai.

Koklam panda MDC Ganesh Debbarma sakha, o music tomung kwrwi hinkhe Tiprasa dopha teibo tolao kwlwksawi thangsokhamu. Abono bagwino music no chwng teibo swkangwi twlangthai.

Pandao manjakha College ni swrwngnairog, EM Rabindra Debbarma , EM Suhel Debbarma, MDC Ganesh Debbarma no khobwi tei kubuni samung tangnairog.