17th Tripuri Dopha Hojagiri Ter : Tripura hasteni Tal Pohor Club ni luajimungbai khwlaijakha
Srangsalo Tripura hasteni srisitini palaiwi tongma Hojagiri Ter palaikha Guru Charan High School thwngkhola ni Rabi Charan Thakur Kami, salthang kami. Panda luajinairog wngkha Tripuri Dopha Hojagiri Ter Committee tei Tal Pohor Club.
Pandani naharmung wngkha
“Chini Hukumu, Chini Mukumu,
Hukumu Mwthangdi, Hukumu Phuardi”
A salni pandao sirisiti ni mwsamung eba Hojagiri mwsamung, rwchapmung tei alaida khwlaiwi naithothok khwlaiwi panda akorogbo khwlaijakha.
Koklam pandao MDC Ganesh Debbarma sakha, agini simino chini nana-daburasong salaiwi phaimani Hojagiri manwi khokhe dormo mano hwnwi. Phiyaba abo dormo da man manya abo silaiya. Haiphano kami amchairogo chikon chikon manwi khogwi tongthoklaio. Aborogno mwthakjabaidi.
Teibo nangkukjak khwlaiwi EM Rabindra Debbarma sakha, chwng nugo chini o ter eba Hojagiri terno twiwi dalbidal mwsamung mwsawi hasteni mung kuchuk tisamani tei hayung ha kotoro Hojagiri mwsamungno twiwi sinimung rwmani. Koklam sana thangwi bo a salo Bru hodani kokbo tisakha.
1968 bisio October tal. O bisio puila Tribal Student Federation (TSF) puila achaimani tei Tiprasa no lama phunuknai thai wngkha Rabi Charan Thakur Kami.
Tripura Tribal Welfare Minister Bikash Debbarma sakha, chwng o Mailuma Ter chini dophani baksa baksa tongkosong lukurog drugs hai chamung hamyarogno hakchal khwlainano twiwi dophani sijak nukjakrog no bwskango himwi samung khainani bagwibo koikha. Tripura ni kwcham agini sirisitini raida tei ter no rwksawi kwmajakrogno rutugwi ma tikhwlainai.
Pandao manjakha montri Bikash Debbarma, Jagadish Debbarma(TTAADC, Chairman), EM Rabindra Debbarma, MDC Ganesh Debbarma, MLA Swapna Debbarma, Tony Debbarma tei Tal Pohor Club ni adongno khobwi kubuni samung tangnairog.
