KOHM ni bwkhaktwi chwngsasa kangba bijap tikhwlaikha
KHM(Kokborok Hukumu Mission) 1993 bisini simi bijap karinani samung chengmani. Sana thangkhe bisi thamchi(30 Years) romwi samung khwlaijak. O mission kwbangma Tripurani mungwnang swikrwngrog tongo. Tei kwtal achaisongnobo dumsajagwi tongo. KOHM ni wngwi kangba bijap karijakma panda khwlaijakha chasalni sairikni dambwrwi tamphuru. A salo Kokborokni hapharo kaisa chwngsasa kangba bijap tikhwlaikha. O bijaprogni mung wngkha Republic of Joiland(Chandramani Debbarma), Holongo swijak kokbiti(Dr. Bijoy Debbarma), Tipra Jatir bagya biparjoyer mulya sri dasarat deber buhima( Aghore Debbarma), Hapingo Srapsa( Women Poets along with their short biography), tei Tipra jatir bisoye(Binoy Debbarma). Agartala bijap banik no tikhwlaina kok tongmani phiya kebengmung ni bagwi tikhwlai manliya. O panda kotorkhe khwlainani kok tongmani hwnwi sakha Dr. Bijoy Debbarma.
Aghore Debbarma kwdwkma swkangno bijap swijak tongmani kebo khoroksa abono tikhwlaina soiya eba gosiya, bo bijap karina naikheno ah jora phano tongnai haphang,Borogno tikhwlairwna gosiya. Bo aboni ulo KOHM no yapharkha o bijapno.Bini bijap o swrai swrai swijakha India Govt.bai Tripura kwthamani ulo bahaikhe Tiprasa bosong norjakha tei tamo tamo patimung wngkha jotono sukurubwi swijak tongo. Abono karwibo porimani bisingtwi kaham knowledge mano tei bijap porina belai nangsugmani kokbo sakha KOHM ni President.
Kokborok kokrwbai bijap ni bechepbo sana thangkhe chini bisingo maturity sokphaikha eba sikla soknani chengkha haiyakhe risa sorchana chengkha. Chini borok bwskango phaiwi tongo bijapni berem o tei rangbo ajiwi tongo. Joto bwthai phunuksanai Kokborok Hukumu Mission no hwnwi chwng chirigwi sawi mano hwnwi sakha KOHM ni President Dr. Bijoy Debbarma.
abono karwibo alaida khwlaiwi a salni koktwma thumanirogni panda tongo Binoy Debbarma, Sharmila Debbarma, Shyamali Debbarma no khobwi tei kwtal achai swikrwngrog.
