Hayung tongkhor sal (World Environment Day) 2023
Hayung tongkhor sal (World Environment Day) 2023 twiwi kaisa nangkukjak samung bwtang yago naharkha . Kraksalo Yuva Vikash Kendra tei Nabard Sports and Recreation Club ni thansa luajimungni bisingtwi kraksalo Agartalani Umakanta Academy o khwlaijakha buphang kaimung panda. Bwskang bisikthamni bagwi o buphangrogno naikini khwlainani bagwi barja naharwi samung khwlainani kok sakha o dolnwi Org. a salni koklam pandao manjakha Agartala Municipal Corporation adong okra Dipak Majumder no khobwi Nabard ni kuchuk beremni samung tangnai akorog. A salo rwngnokni swrwngnairogno karwibo amchaini chakrakrogno pandao kwrwngkha. Teikhaksa bwkhak a salni kokbothoma wngkha phangsa buphang tankhe phangchi buphang kaidi. Khatung khajani bisingo amchaini hoda hamkraini samung tangnairogbo pandao kwrwngkha.
Bugrakhor Agartala ni kwchamkuk bugra molni rwngnok hwnwi sinijak Umakanta Academy 1862 bisio songsajakmani. O rwngnok songchanai Maharaja Bir Chandra Manikya. O thaiono khwlaijakha Hayung tongkhor sal.
Hayung ha kotorbai baksa Tripura hasteobo aboni samung bwtang khwlaimani nukjakha. Tei khaksa bwkhak dalbidal thairogo abohai yapri naharjagwi tongo, thinangobo abohai kahamkuk samungrogni yapri naharjaknai. Phiya a salni pandao joto bwkhaktwi chubachuni yak pholokha Yuva Vikash Kendra tei Nabard. Buphang waphang chini langmani bagwi belai nangkukjak. Aboni bagwi jeswk mansak buphangno kainani tei buphang waphangno naikini khwlaithai. Hasteo hamkraini samung humungrog khwlaithani Kwbangma thairogni buphang waphang tanphaijagwi tongo. Ayang bwkhak naisigwi buphang waphang kainani belai nangsugo. Phangsa kaina nangmao tei phangchi kaidi hwnwi lukurogno koktwma thumnairogni bisingtwi kok kwcharkha pandao manjaknai nograirog.
